الْحَمْدُ
لِلَّهِ
نَحْمَدُهُ
وَنَسْتَعِينُهُ
وَنَسْتَغْفِرُهُ
وَنَعُوذُ
بِاللهِ مِنْ
شُرُورِ أَنْفُسِنَا
وَسَيِّئَاتِ
أَعْمَالِنَا
مَنْ يَهْدِهِ
اللهُ فَلاَ
مُضِلَّ لَهُ
وَمَنْ يُضْلِلْ
فَلَنْ
تَجِدَ لَهُ
وَلِيًّا مُرْشِدًا,
وَأَشْهَدُ
أَنْ لاَّ
إِلَهَ
إِلاَّ اللهُ
وَحْدَهُ لاَ
شَرِيكَ لَهُ
وَأَشْهَدُ
أَنَّ مُحَمَّدًا
عَبْدُهُ
وَرَسُولُهُ ,
اللَّهُمَّ صَلِّ
وَسَلِّمْ
وَبَارِكْ
عَلَى
مُحَمَّدٍ
صَلَّى اللهُ
عَلَيْهِ
وَسَلَّمَ
وَعَلَى
آلِهِ
وَصَحْبِهِ
وَمَنِ
اهْتَدَى بِهَدْيِهِ
إِلَى يَوْمِ
الدِّينِ.
وَبَعْدُ:
فَيَاعِبَادَ
اللهِ
يَقُولُ
الْحَقُّ تَبَارَكَ
وَتَعَالَى
فِي
الْقُرْآنِ
الْكَرِيمِ:
إِنَّا
كُلَّ شَيْءٍ
خَلَقْنَاهُ
بِقَدَرٍ.
Manga Oripn o Allah, giyangkai a doniya a pphangongoyagan tano ron na matataragombalay sa katao a maolad a romarangkom, ka opama o di giyanan i btad iyan na di thagompiya so kibabatog sii, sa so kaoyagoyag ko pithibarangan o blangan iyan ago so sosonan iyan na makatitindg sii ko katao, so manga bitoon ko manga lalan iyan, go so kadidiyangkaa ko kaphlalakaw niyan ago so panga wawatan iyan, go so lopa a katatagoan rki tano, na go so madadalm on a pd sa kaadn a oyagoyag na langon oto makatitindg ko katao o Allah  a so da dn a maphagma on a shayi sii ko langit ago sii ko lopa. Sabnar a katawan o Allah so nganin a khaadnan ko kaadn iyan ko da niyan on pn kaadna, pitharo iyan a:
إِنَّا
كُلَّ شَيْءٍ
خَلَقْنَاهُ
بِقَدَرٍ.
Mataan a skami na inadn ami a langowan a shayi sa minggolalan sa okoran a madidiyangka. (Surah Al Qamar 054:049)
Go miyaaloy ko hadith a Sahih a so Ras?lullah  na pitharo iyan a:
إِنَّ
أَوَّلَ مَا
خَلَقَ اللهُ
الْقَلَمُ , قَالَ:
اُكْتُبْ , قَالَ:
أَيْ رَبٍّ , وَمَا
أَكْتُبُ؟
قَالَ: اُكْتُبْ
مَقَادِيرَ
كُلِّ شَيْءٍ
إِلَى أَنْ
تَقُومَ
السَّاعَةُ.
Mataan a aya paganay a nganin a adnn o Allah na so pansom (al Qalam) sa pitharo iyan on a: Sorat ka. Na pitharo iyan a: Kadnan ko antonaai izorat akn? Na pitharo iyan a: Soratn ka so manga diyangka o langowan a shayi sa taman sa makatindg so bangkit.
Manga Oripn o Allah, gitas o Allah ago kiyokom iyan a giyangkai a kibabatog ago so langowan a madadalm on na makaaayon dn sangkoto a okoran odi na diyangka a miyaadn sa paganay. Sa so kabaya o Allah a mamamantk ago da dn a ba on phakarn na inadn iyan angkai a kaadn a langkap sa piyakaayon iyan sangkoto a okoran iyan.
Sabap roo, na pharatiyayaan tano a mataan a so Allah na skaniyan i khirk ko okoran a mapiya ago so marata sa tarotop a paratiyaya, sa so di san kaparatiyayaa o manosiya na khabaloy skaniyan a datar o ba niyan sinditi so Allah sa daa katao niyan, sa so taw a di niyan paratiyayaan o ba so Allah na katawan iyan so langowan taman ko da niyan on pn kaadna, na iphropa niyan so Allah sa daa mlng iyan, a so Allah na katawan iyan ago gpa iyan ago kaip iyan so nganin a miyaadn, ago so nganin a khaadn, go so nganin a da maadn a opama o miyaadn ago andamanaya i kakhaadn iyan na palaya dn oto katawan o Allah .
Misabap san, na miyaadn so kaparatiyayaa ko okoran o Allah a pd ko manga pakaasal o paratiyaya, go pd ko okoran a katokawi o oripn sa langowan a shayi a minisogat on a pd sa mapiya odi na marata na skaniyan oto na minggolalan sa okoran ago takdir o Allah , go pd ko katharoo Ras?lullah ko Ibn Abbas a:
وَاعْلَمْ
أَنَّ
الأُمَّةَ
لَوِ
اجْتَمَعَتْ
عَلَى أَنْ
يَنْفَعُوكَ
بِشَيْءٍ , لَمْ
يَتْفَعُوكَ
إِلاَّ
بِشَيْءٍ
قَدْ
كَتَبَهُ اللهُ
لَكَ , وَإِنِ
اجْتَمَعُوا
عَلَى أَنْ
يَضُرُّوكَ
بِشَيْءٍ
لَمْ
يَضُرُّوكَ
إِلاَّ
بِشَيْءٍ
قَدْ
كَتَبَهُ
اللهُ
عَلَيْكَ , رُفِعَتِ
الأَقْلاَمُ
وَجَفَّتِ
الصُّحُفُ.
Knal angka a so pagtaw na o thimotimo siran sa bgan ka iran sa gona (kamapiyaan) sa nggolalan sa isa a shayi, na di ka iran dn kabgan sa gona sa nggolalan sa shayi inonta bo o nggolalan sa shayi a inisorat o Allah a rk ka, na o thimotimo siran sa kambinasaa iran rka sa nggolalan sa isa a shayi, na di ka iran dn kabinasaan inonta bo o nggolalan sa shayi a inisorat o Allah a phakabinasa rka, sa inangkat so pansom, ago miyamara so pandangan (ko kinidakatn iyan roo).
Manga Oripn o Allah, sii ko kaparatiyayaa o Manosiya sangkanan a okoran o Allah na khabaloy niyan so taw a lomilintad i mokarna go thatana i poso, sa di skaniyan kaphakatkawan o tiyoba a masakit igira miyasogat iyan, ago di skaniyan mapakaphagambog o limo igira miyakowa niyan, ka kagiya katawan iyan a langowan a mapnggolawla na matatago sa okoran o Allah , pitharoo Allah a:
مَا
أَصَابَ مِنْ
مُصِيبَةٍ
فِي الأَرْضِ
وَلاَ فِي
أَنْفُسِكُمْ
إِلاَّ فِي
كِتَابٍ مِنْ
قَبْلِ أَنْ
نَبْرَأَهَا ,
إِنَّ ذَلِكَ
عَلَى اللهِ
يَسِيرُ , لِكَيْلاَ
تَأْسَوْا عَلَى
مَا فَاتَكُمْ
, وَلاَ
تَفْرَحُوا
بِمَا
آتَاكُمْ.
Go da a pd sa nganin a miyakasogat a pd sa tiyoba sii ko lopa, go da pn sii ko manga ginawa niyo inonta a madadalm dn oto sa isa a panoratan ko onaan o da ami ron pn kaadna, mataan a giyoto sii ko Allah na malbod, ka an kano di makapmboko sa nganin a miyapapas rkano, ago di kano mababaya ko nganin a inibgay niyan rkano. (Surah Al Hadid 057:022-023)
Misabap san manga Oripn o Allah, na khabaloy so Mu’min a salakaw dn a manosiya a phlalakaw ko lopa, a aya waraan iyan na o masogat a tiyoba a marata na zabar (phantang) ko okoran o Allah , na o masogat a mapiya na manalamat ko Allah , na sii sangkoto a dowa a btad na pkhaparoli niyan so balas o Kadnan iyan, na sii sangkoto na pitharoo Ras?lullah a:
عَجَبًا
ِلأَمْرِ
الْمُؤْمِنِ ,
أَمْرُهُ
كُلُّهُ
خَيْرٌ , إِنْ
أَصَابَتْهُ
سَرَّاءَ
شَكَرَ , فَكَانَ
ذَلِكَ
خَيْرًا لَهُ ,
وَإِنْ
أَصَابَتْهُ
ضَرَّاءَ
صَبَرَ ,
فَكَانَ
ذَلِكَ
خَيْرًا لَهُ.
Piyakammsa so btad o mu’min, a so btad iyan na langon dn mapiya, a o masogat skaniyan a mapiya (limo) na manalamat, na maadn oto a mapiya on, na o masogat a marata na phantang sa zabar na maadn oto a mapiya on.
Go bnar so Allah gowani a tharoon iyan a:
مَا
أَصَابَ مِنْ
مُصِيبَةٍ
إِلاَّ
بِإِذْنِ
اللهِ , وَمَنْ
يُؤْمِنْ
بِاللهِ
يَهْدِ
قَلْبَهُ.
Daa miyakasogat a pd sa tiyoba inonta a minggolalan sa idin o Allah, na sa taw a paratiyayaan iyan so Allah, na thoroon iyan so poso iyan. (Surah At Tagabun 064:011)
Manga Oripn o Allah, patoray a kasabotan tano phiyapiya a so okoran o Allah na aya kabthowa on ko basa Arab na Al Qadha wal Qadar, dowa nan a katharo a so Al Qadha. Ago so Al Qadar, aya ptharoon a Al Qadha, na giyoto so langowan a btad a gitas o Allah ago piyakanggolalan iyan sa da dn a paaran on o oripn ago da a ba niyan on kapakambabayabaya, sabap roo na di ron ipagiza o Allah ago di niyan on izomariya angkoto a btad a minisogat on a daa paaran iyan on, aya ibarat iyan na so kasogat iyan a sakit, odi na so kiyaadna on a mapoti i kobal odi na maitm i kobal odi na maporo i tindg odi na mababa i tindg odi na inimbawata a skaniyan a babay odi na mama, sa giyangkanan a manga btad na gtas anan a piyakanggolalan o Allah sabap ko ongangn (hikmah) niyan a maporo a skaniyan bo i matao ron, sa di dn anan izomariya ko manosiya o ino niyan oto khasowa.
Adn pman a manga shayi, a mapnggolawla o manosiya a adn a kapakambabayabaya iyan on sa khapakay a nggolawlaan iyan na khapakay pn a di niyan nggolawlaan sa palaya iyan mipapaar angkoto a dowa a kabaya ago dowa a gaga, na giyangakanan a btad a piyakambaya on so manosiya ko kapnggalbk ago so di kapnggalbk, na san pagisipa so manosiya ago san zomariyaa, a giyanan i kiyanggolalanan o sosonan o Allah (manhaj) a so kasapar ago so kasogo, aya maana niyan na sii siyapari so manosiya ko nganin a khagaga niyan a kanggalbka niyan on, go sii siyogo so manosiya ko nagnin a khagaga niyan a di niyan on kanggalbka, inoka siyapari ka kagiya khagagangka nggalbk so inisapar rka, na ino ka siyogo ka kagiya khagaga ngka a di ngka on kapnggalbka, sa patoray a kasabotan anan o manosiya phorong, di khapakay o ba sapari so taw ko di niyan khagaga nggalbk ka daa bali o kasapar sangkoto a btad, aya ibarat iyan na so kagiraw ngka ko bota a di ngka pagilaya a toladan anan, sa daa bali o kiyasapari ngka on ka saparan ka sa di na di niyan bo khailay ka skaniyan na bota, na so Allah na lbi a Maongangn a di so inadn iyan, sa di niyan pnggolawlaan so btad a maphamaganta on o kaadn iyan, datar oto a di ngka zogoa so manosiya a di niyan bo khagaga so izogo oka on, ka datar o katharo angka on a tabid angka a langit, ka so kasogoa on ago so di ron kasogoa na mlagid ka di niyan bo khagaga.
Manga Oripn o Allah, giyangkanan a btad a makam-babayabaya on so manosiya ko kapnggalbka on ago so di ron kapnggalbka, na san miyapayag angkoto a ptharoon a Al Qadar, so okoran o Allah , sa aya inokor o Allah na so katawi niyan ko pnggolawlaan o manosiya sangkanan a btad ko da niyan on pn kaadna, sabap sa so Allah , na lambas so katao niyan ko langowan taman, na so manosiya na aya kakhanaraka iyan odi na kakhasorga iyan na sabap sangkanan a btad a pinggolalanan o kasapar ago kasogo, sa o nggolawlaa niyan so inisogo on na makasorga, na o sopaka niyan so inisapar on na makanaraka, saman oto na so manosiya na bigan sa kapaar ko kapzorga iyan ago so kaphnaraka iyan, sa da on tgla o Allah , sa ba niyan kiyokom a naraka odi na sorga, aya bo a inokor o Allah na so katawi niyan sa so manosiya na pnggalbk sa kapzorga iyan odi na panggalbk sa kaphnaraka iyan.
Giyoto i maana o pkhan’g tano a hadith o Ras?lullah , a amay ka pmansokan sa niyawa so ikaogat ko kandangan o ina na sogoon o Allah so Malaikat iyan sa isorat iyan so diyangka o ajal iyan (omor iyan) so kadakl o pagpr iyan (rizki niyan a kakahan iyan ko lopa) so khabolosan iyan o phnaraka antaa ka pzorga, sa giyangkoto a inisorat o Maikat na di dn oto phliwag ka giyoto so katao o Allah a lomalambas ko talikhodan o masa a giyoto i ptharoon a okoran a mapnggolawla o manosiya, a di dn phakaliyo ko katawi ron o Allah .
Miyan’g tano so hadith o Ras?lullah , a so manosiya ko kaoyagoyag iyan na pnggolawla sa galbk a khisorga iyan taman sa aya bo a kawatan iyan ko sorga na rpng a barokan, na kaonaan ska niyan o sorat (kitab a giyoto so inisorat o Malaikat a ilmo o Allah ko kikaogatn sangkoto a manosiya, a giyangkoto a manosiya na phnaraka) na nggalbk sa galbk a khinaraka na ron mapotos sa kaposan na makanaraka skaniyan, sa datar oto so kaklida on, sa adn a manosiya a pnggalbk sa galbk a khinaraka taman sa aya bo a karani niyan on na rpng a barokan, na kaonaan skaniyan o sorat (kitab a so inisorat o Malaikat a ilmo o Allah a si aki oto na pzorga) na nggalbk sa galbk a khisorga na ron mapotos na makasorga.
Manga Oripn o Allah, sabota niyo angkoto a hadith a inaloy niyan a sii sa kaposan na so marata i galbk na kagiya phatay na minggalbk sa mapiya na miyakasorga, datar oto mambo so giinggalbk sa mapiya a kagiya phatay na minggalbk sa marata na miyakanaraka, aya sabap oto na di khapakay ko Allah o ba niyan pakasorgaa so taw a aya galbk iyan na kapnaraka, sa datar oto a di niyan phakanarakaan so taw a aya galbk iyan na kazorga, sa patoray a so phakanaraka na makanggalbk sa khinaraka iyan, sa datar oto mambo so pzorga na patoray a makanggalbk sa khisorga iyan.
Samanan Manga Oripn o Allah, na so kakhasorga aka ago so kakhanaraka aka, na sii rka matitimo, di ngka khisndit ko Allah ago da ka niyan okora a ba ka naraka odi na sorga, sii rka dn miyatimo o phnaraka ka antaa ka pzorga ka, ogaid na so Allah na katawan iyan so pnggolawlaan ka ko da ngka on pn kanggolawlaa giyoto i sabap a pakisosorat iyan dn ko Malaikat so zowaan ka sa kaposan, sa ska a manosiya na di ngka katawan so mapng-golawla ngka ko pkaori a masa, giyoto i sabap a lalayon tano pphangnin ko Allah a toron tano niyan ago tatapn tano niyan ko toroan iyan, ka kagiya so shaytan na da dn a iddkha iyan ko kapndadaga niyan ko manosiya ka an maolog ko naraka sa mipagpda iyan roo.
Madakl a manosiya a dadag so sabot iyan ago so paratiyaya niyan ko okoran, ka aya katao niyan on na inokor skaniyan o Allah a sorga odi na naraka, na ribat anan a paratiyaya ka di ndait ko kaontol o Allah o ba ka niyan paliyogati sa kanggalbk ka sa khisorga a papasasdn iyan bo a naraka ka, aya mataan na so manosiya na tiyoro iyan sa dowa a lalan na piyayag iyan on so langowan a balas ago siksa sa ngkoto a dowa a lalan na ska a manosiya na kapaar ka so kapzamili ika sangkanan a dowa lalan, sa sa dn sa khabayaan ka on na khakowangka, aya bo a sangan roo o Allah na so katawi niyan ko pnggolawlaan ka ko da ngkaon pn kanggolawlaa.
Manga Oripn o Allah, gowani a adnn o Allah so sorga ago so naraka, na piyakiilay niyan ko Jibril, na kagiya mailay o Jibril so sorga na pitharo iyan a da dn a sakataw bo a manosiya ko doniya a ba sii di mabaya somold, na pitharoo Allah a kagiya pliyotn akn so sorga a langowan a shayi a di khabayaan nggalbk o manosiya, na kagiya mailay niyan so naraka na pitharo iyan a da dn a sakataw bo a manosiya a ba sii sold, na pitharoo o Allah a kagiya pliyotn akn so naraka a langowan a pkhababayaan o manosiya. Sabap roo na mimbaloy a aya lalan ko sorga na langowan a mapnd ko ginawa o manosiya a di niyan khababayaan nggalbk a bobokln iyan, na so naraka na aya lalan on na langowan a phkababayaan o ginawa o manosiya, na so shaytan na giyanan i lalan iyan ko manosiya a pmbodiyokn iyan ko pkhababayaan o ginawa niyan taman sa kalipatan o manosiya so kaosara niyan ko akal iyan, sa aya kaonotan iyan na so baya a ginawa niyan na mapozang dn ko langdng o naraka.
Manga Oripn o Allah, sii sangkai a doniya na igira iphamanik so lakongan a ator ko poro o palaw na sayana dn a margn a galbk ka mangingindaw sa bagr a mala ago dokaw a mapitl, na amay ka mipamanik angkoto a lakongan ko poro o palaw na di dn awid a akal so kimbabaan on ko itado o palaw ka maito bo a alid na pthambalilid so lakongan sa tanto a magaan a kakhaolog iyan sa baba, na giyanan i bayambayanan o kakowaa ko sorga a kaphanagontamanan ka mala i arga a limo, na so kazombo ko naraka na di mangingindaw sa mala a romasay, so mnang o manosiya na sayana a margn a mbaalan, na igira mbinasaan na sayana a malbod.
Manga Oripn o Allah, aya bayambayanan o kazorga na datar o kapanik sa towak a maporo a so kapzakat ka on na mangingindaw sa bagr ago thkhs a mala, giyoto i sabap a so sorga na bithowan sa darajat, manga pangkatan a datar o kritan o towak ko kapphanik on, so pman so naraka na datar o kapanog ko towak a di mangingindaw sa bagr a mala ka giyabo a kipmbibayin ka sa ski ngka na pphakapanog ka ko kritan o manga towak, sa so naraka na bithowan sa darakat a manga kritan o towak sa baba a sopaka o darajat a so kritan iyan ko kapamanik. Samanan na so sorga na manga pangkatan a maporo, na so naraka na manga pangkatan sa kababan, so sorga na datar o kapamanik ko palaw, na so naraka na datar o kathipo ko landing, sa giyanan i mapayag a ibarat iyan.
Manga Oripn o Allah, takika niyo sa ginawa niyo a giyangkai a doniya ago so langowan a madadalm on na giinggolalan sa sabap, sa daa ba sii khaadn a shayi a daa sabap iyan, ka giyai so ingd a katatagoan ko sabap ago so misasabap on, sabap san na so okoran o Allah na di niyan mizosopaka so kaosara ko manga sabap, ogaid na aya thito a kaparatiyayaa ko okoran o Allah na so kaosara ko manga sabap a inadn o Allah sangkai a lopa, sa amay ka maosar so langowan a sabap na mampn ka zarakan so manosiya ko okoran o Allah . Sa so di kaosara ko sabap sa thapapay so manosiya ko okoran iyan sa di khaokhaog na giyanan na mala a dosa ago kasopak ko kabaya o Allah , sabap sa inadn iyan so doniya a tatagoan iyan sa sabap na wajib ko manosiya a kaosara niyan ko doniya sa nggolalan ko sabap iyan.
Manga Oripn o Allah, di khapakay ko manosiya, na aya lawan on na so Muslim, oba badn ggnk sa phnayaon iyan i okoran o Allah , aya paliyogat on na pnggalbk ko langowan a kapasang iyan ko kapagosara niyan ko sabap, oriyan iyan na mbayorantang ko okoran o Allah . Okhabaya i niyan a kabaloy niyan a kawasa na okiti niyan so lalan ko kakhawasa, na amay ka da khawasa na mbayorantang ko Allah , ka so Allah na katawan iyan so pagns a ska niyan a manosiya na di niyan katawan, sa adn a shayi a pkhababayaan o manosiya a giyoto i marata on, na adn a marata on a kapipikira niyan on a giyoto i mapiya on sii ko limo o Allah , miyaaloy ko hadith Qudsi a so Allah na pitharo iyan a langowan a phangnin o oripn iyan na khagaga niyan a kibgan iyan on sii kiran, ogaid na adn a miyamangni a da niyan on bgan so pangni niyan sangkai a doniya ka kagiya phakabinasa on o makowa niyan, ogaid na imbgay ron o Allah ko alongan a maori sa imbbts iyan on, sa giyoto i lalayon pipikira o oripn o Allah, a amay ka so piyanamaran iyan ko doniya na da niyan makowa ko kiyaokiti niyan ko langowan a sabap a inibgay o Allah , na tatangkda niyan a sii ko akhirat na imbgay ron o Allah so mapiya sa limo iyan on.
Manga Oripn o Allah, giyai i kaposan ko manga rokon o paratiyaya a giitano zabandingn sangkai a manga jumuat a miyaka-thondotondog, sa aya kiyatinsan sangkai a bandingan, na pharatiyayaan tano a mataan a so Allah na inokor iyan so langowan taman, sa minggolalan ko kabaya iyan ago so katao niyan, sa da dn a mapnggolawla inonta a zisii ko kabaya iyan ago katawan iyan ago madidiyangka iyan sa tarotop. Sa giyangkai a okoran o Allah na piyagma iyan ko oripn iyan oba niyan katokawi, ka pantag oto sa kamapiyaan o oripn.
Sa amay ka paratiyayaan anan o manosiya, na thakna so poso iyan ago so ginawa niyan sa di kattkawan ko pphamangitalmba a manga pankaw o kibabatog ko mapiya on ago so marata on sabap sa kagiya paparatiyayaan iyan a langowan a mapnggolawla na sii sa kabaya o Allah ago sii ko limo niyan. Ogaid na patoray ko manosiya a katokawan iyan a so kapnggalbka niyan ko nganin a bigan on sa kapakam-babayabaya na di niyan khidaawa i aya kiyanggalbka niyan on na sabap ko tgl o okoran o Allah , sa o khanaraka na ba niyan daawaan i miyanggolawla ko anan ka kabaya o Allah a inokor ako niyan on, ka giyanan na tindg a ribat ago dadag, sa langowan a pinggalbk o manosiya a makambabayabaya on na ipagiza on ago izomariya on, sa so siksa iyan na phakatana on sa di niyan khidaawa so Allah , ko manga dosa niyan, ka kagiya kiyalalangan skaniyan sa miyaona sa di niyan oto pnggolawlaa.
Manga Oripn o Allah, pangnin tano ko Allah a balowin tano niyan a pd ko manga taw a pphamakin’gn iran so katharo na phagonotan iran so lbi ron a mapiya.
وَأَقُولُ
قَوْلِي
هَذَا
وَأَسْتَغْفِرُ
اللهَ لِي
وَلَكُمْ
وَلِسَائِرِ
الْمُسْلِمِينَ
مِنْ كُلِّ
ذَنْبٍ
فَاسْتَغْفِرُوهُ
إِنَّهُ هُوَ
التَّوَّابُ الرَّحِيمُ
Wa aqūlu qawlī hādā wa astagfirullāha lī wa lakum wa lisāiril Muslimīn min kulli dambin fastagfirūhu innahu Huwat Tawwābur Rahīm.
Copyright © 2008 Maranao Khutbah™
By Alim, Hassanor M. Alapa All rights reserved - http://www.muslimtents.com/maranao-khutbah
Copying and distributing of the Maranao Khutbah published in this website is sanctioned by the author for non-commercial only. In consideration of this authorization, any reproduction and distribution of the Maranao Khutbah shall retain all copyright, author and other proprietary notices contained therein. It shall not be altered in any form without the written consent of the author and the publisher.
|